13. கடன்
பட்டவருக்காகப் பரிந்துரை செய்தல்
கடன் கொடுத்தவர் கடன் வாங்கியவரை நெருக்கும்போது கடன் வாங்கியவர் பரிந்துரை
செய்யுமாறு கோரிக்கை வத்தால் பரிந்துரை செய்து அவரது சிரமத்தைக் குறைப்பதற்கு உதவ
வேண்டும். நபியவர்கள் தம்முடைய தோழர்களுக்காக இவ்வாறு பரிந்துரை செய்துள்ளார்கள்.
(நபிகள்
நாயகம் (ஸல்) அவர்களின் காலத்தில்) எனக்கு அப்துல்லாஹ் பின் அபீஹத்ரத் அல்அஸ்லமீ
(ரலி) அவர்கள் தர வேண்டியிருந்த ஒரு கடனை (மஸ்ஜிதுந் நபவீ) பள்ளிவாசலில் வைத்து
திருப்பித் தரும்படி கேட்டேன். (இது தொடர்பாக எங்களிடையே வாக்குவாதம் ஏற்பட்டு)
எங்கள் இருவரின் குரல்களும் நபிகள் நாயகம் (ஸல்) அவர்கள் வீட்டிலிருந்தபடியே அதைக்
கேட்கும் அளவிற்கு உயர்ந்தன. நபிகள் நாயகம் (ஸல்) அவர்கள் எங்களிருவரையும் நோக்கி
வந்தார்கள். தமது அறையின் திரையை விலக்கி, "கஅப்!
என்றழைத்தார்கள். நான், "இதோ வந்துவிட்டேன், அல்லாஹ்வின்
தூதரே!'' என்று பதிலளித்தேன். அப்போது நபிகள் நாயகம் (ஸல்) அவர்கள்,
"இதை (இந்த அளவை) உன் கடனிலிருந்து தள்ளுபடி செய்துவிடு!''
என்று கூறி பாதியளவு கடனைக் குறைத்துக் கொள்ளும்படி
(என்னிடம் விரலால்) சைகை செய்தார்கள். "அவ்வாறே செய்து விட்டேன், அல்லாஹ்வின்
தூதரே!'' என்று கூறினேன். பிறகு நபிகள் நாயகம் (ஸல்) அவர்கள்
(அப்துல்லாஹ் பின் அபீஹத்ரத் அவர்களை நோக்கி,) "எழுந்து
சென்று கடனை அடைப்பீராக!'' என்று சொன்னார்கள்.
நூல் : புகாரி 457, 471, 2418, 2424, 2706,
2710
அதே பேன்று ஜாபிர் (ரலி) அவர்களுக்காகவும் நபிகள் நாயகம் (ஸல்) அவர்கள் பரிந்துரை
செய்துள்ளார்கள். ஆனால் கடன் கொடுத்தவர்கள் அதனை ஏற்றுக் கெள்ளவில்லை.
\
என் தந்தையார் உஹதுப் போரின்போது, அவர் மீது
கடன் இருந்த நிலையில் (ஷஹீதாகக்) கொல்லப்பட்டு விட்டார்கள். கடன் கொடுத்தவர்கள்
தம் உரிமைகளைக் கேட்டு கடுமை காட்டினார்கள். உடனே, நான்
நபிகள் நாயகம் (ஸல்) அவர்களிடம் சென்றேன். (விஷயத்தைக் கூறினேன்.) நபிகள் நாயகம்
(ஸல்) அவர்கள் கடன் கொடுத்தவர்களிடம் என் தோட்டத்தின் பேரீச்சம் பழங்களை
(கடனுக்குப் பகரமாக) ஏற்றுக் கொண்டு என் தந்தையை மன்னித்து (மீதிக் கடனைத்)
தள்ளுபடி செய்து விடும்படி கேட்டுக் கொண்டார்கள். (அவ்வாறு செய்ய) அவர்கள் மறுத்து
விட்டனர். ஆகவே, அவர்களுக்கு அந்தப் பேரீச்சம் பழங்களை நபிகள் நாயகம் (ஸல்)
அவர்கள் கொடுக்கவில்லை. மாறாக, "நாம்
உன்னிடம் காலையில் வருவோம்'' என்று கூறினார்கள். பிறகு காலையில் என்னிடம் வந்தார்கள்.
பேரீச்சை மரங்களிடையே சுற்றி வந்து, அவற்றின்
கனிகளில் பரக்கத்துக்காக துஆச் செய்தார்கள். பிறகு, நான்
அவற்றைப் பறித்துக் கடன் கொடுத்தவர்களின் கடன்களையெல்லாம் திருப்பிச்
செலுத்தினேன். (முழுக் கடனையும் தீர்த்த பின்பும்) அதன் கனிகள் எங்களுக்கு மீதமாக
இருந்தன.
நூல் : புகாரி 2127, 2395, 2396, 2406, 2601,
2709