இறையருள் பெற...
அல்லாஹ்வுக்கும்
அவன் தூதருக்கும் கட்டுப்பட்டு, வணக்க
வழிபாடுகள் புரிந்து, நல்ல முஸ்லிம்களாக வாழ்ந்திட
வேண்டும் என்ற எண்ணமும் ஆவலும் பல முஸ்லிம்களிடம் இருக்கின்றது. எனினும்
அதனடிப்படையில் செயல்படத் துவங்கும் போது ஷைத்தான் ஏதேனும் வழியில் குறுக்கிட்டு
அத்தகைய நன்மக்களை நல்லமல்கள் புரிவதை விட்டும் தடுத்து, கெடுத்து
விடுகிறான்.
"நீ என்னை வழி கெடுத்ததால் அவர்களுக்காக உனது
நேரான பாதையில் அமர்ந்து கொள்வேன்'' என்று
(இப்லீஸ்) கூறினான். "பின்னர் அவர்களின் முன்னும், பின்னும், வலமும், இடமும்
அவர்களிடம் வருவேன். அவர்களில் அதிகமானோரை நன்றி செலுத்துவோராக நீ காண மாட்டாய்'' (என்றும்
கூறினான்).
திருக்குர்ஆன் 7:16,17
நல்லோர்களை வழிகெடுப்பதே ஷைத்தானின் இலக்கு என்பதால்
நன்மைகள் புரிவதற்கு பெரும் தடைக்கல்லாக ஷைத்தான் திகழ்கிறான் என்பது உறுதி. அவனது
சதிவலைகளைத் தாண்டி நல்லமல்கள் புரிய வேண்டும் எனில் அதற்கு இறையருள் அவசியம்
தேவையான ஒன்றாகும்.
இறைவனை வழிபடுவதற்கு இறையருள் தேவை என்பதால் தான்
அல்லாஹ்வின் தூதர் ஸல் அவர்கள் பின்வருமாறு பிரார்த்தனை செய்துள்ளார்கள்.
நபி (ஸல்) அவர்கள், முஆத்
(ரலி) அவர்களின் கையைப் பிடித்துக் கொண்டு, "முஆதே!
உன்னை நான் நேசிக்கின்றேன். முஆதே!
அல்லாஹும்ம அயின்னீ அலா திக்ரிக வஷுக்ரிக வஹுஸ்னீ இபாததிக
பொருள்: அல்லாஹ்வே! உன்னை நினைப்பதற்கும் உனக்கு நன்றி
செலுத்துவதற்கும் உன்னை அழகான முறையில் வணங்குவதற்கும் உதவி செய்வாயாக! என்று
ஒவ்வொரு தொழுகைக்குப் பின்னரும் நீ சொல்வதை விட்டு விடாதே என நான் உனக்கு
அறிவுறுத்துகின்றேன்'' என்று கூறினார்கள்.
அறிவிப்பவர் : முஆத் (ரலி), நூல்கள்
: அபூதாவூத் 1301, நஸயீ 1286
எனவே நன்மைகள் புரிய இறையருள் எவ்வளவு முக்கியமானது என்பது
குறித்தும் அதைப் பெறுவதற்கான வழிமுறைகள் என்ன என்பது குறித்தும் குர்ஆன், ஹதீஸ்
கூறும் சில முக்கிய தகவல்களைக் காண்போம்.
சொர்க்கம் செல்ல காரணி
முஸ்லிம்களின் இலக்கு மறுமையில் வெற்றி பெற்று சொர்க்கம்
செல்ல வேண்டும் என்பதே. அத்தகைய சொர்க்கத்தினுள் மனிதர்கள் செல்ல தங்கள்
வழிபாடுகளை விடவும் முக்கிய காரணமாக இறையருளே திகழ்கிறது.
அல்லாஹ்வின் தூதர் (ஸல்) அவர்கள்,
"உங்களில் யாரையும் அவரது நற்செயல் ஒருபோதும் காப்பாற்றாது.
(மாறாக, அல்லாஹ்வின் தனிப் பெரும் கருணையாலேயே எவரும்
காப்பாற்றப்படுவார்)'' என்று கூறினார்கள். மக்கள் "அல்லாஹ்வின்
தூதரே! தங்களையுமா (தங்களது நற்செயல் காப்பாற்றாது)?'' என்று
வினவினார்கள். அதற்கு நபி (ஸல்) அவர்கள் "(ஆம்) என்னையும்தான்; அல்லாஹ்
(தனது) அருளால் என்னை அரவணைத்துக் கொண்டால் தவிர'' என்று
கூறிவிட்டு, "(ஆகவே,) நேர்மையோடு
(நடுநிலையாகச்) செயல்படுங்கள். நிதானமாக நடந்துகொள்ளுங்கள். (வரம்பு
மீறிவிடாதீர்கள்.) காலையிலும், மாலையிலும், இரவில்
சிறிது நேரமும் நற்செயல் புரியுங்கள். (எதிலும்) நடுநிலை (தவறாதீர்கள்).
நடுநிலை(யைக் கடைப்பிடியுங்கள்). (இவ்வாறு செய்தால் இலட்சியத்தை) நீங்கள்
அடைவீர்கள்Õ என்று சொன்னார்கள்.
அறிவிப்பவர் அபூஹுரைரா (ரலி), நூல்
: புகாரி 6463
சிறந்த செல்வம்
மனிதர்கள் திரட்டும் செல்வங்கள் அனைத்தையும் விட இறையருளே
மிகச் சிறந்த செல்வமாகும்.
அல்லாஹ்வின் பாதையில் நீங்கள் கொல்லப்பட்டாலோ, மரணித்தாலோ
அல்லாஹ்விடமிருந்து கிடைக்கும் மன்னிப்பும், அருளும்
அவர்கள் திரட்டிக் கொண்டிருப்பவற்றை விடச் சிறந்தது.
திருக்குர்ஆன்
3:157
எல்லையில்லா
இறையருள்
அல்லாஹ்வின் அருளுக்கு வரம்போ, எல்லையோ
கிடையாது. ஒரு மனிதன் இறையருளின்மீது அளப்பரிய நம்பிக்கை கொண்டால் அவன்
எங்கிருந்தபோதும் எந்த சூழ்நிலையில் இருந்தாலும் இறையருள் அவனுக்கு கிட்டிவிடும்.
இறையருளை எந்தச் சூழலும் தடுக்க முடியாது. எந்த மனிதனும் தடுத்து விட முடியாது.
மனிதர்களுக்காக அல்லாஹ் திறந்து விட்ட எந்த அருளையும்
தடுப்பவன் எவனும் இல்லை. அவன் தடுத்ததை அவனுக்குப் பின் அனுப்புபவனும் இல்லை. அவன்
மிகைத்தவன்; ஞானமிக்கவன்.
திருக்குர்ஆன் 35:2
நபி யூனுஸ் (அலை) அவர்கள் மீன் வயிற்றில் இருந்த போதிலும்
அன்னாரது தொடர் பிரார்த்தனையால் இறையருளைப் பெற்று மீன் வயிற்றிலிருந்து
விடுதலையானார்கள்.
பார்க்க : திருக்குர்ஆன்
37:142,143,144 மற்றும் 21:87,88
நபி மூஸா (அலை) அவர்களும் அவர்களுடன் நம்பிக்கை கொண்ட
மக்களும் பிர்அவ்னிடமிருந்து தப்பிக்க ஓடிச் சென்றபோது கடல் குறிக்கிட்ட்து.
தரையில் வழி ஏற்படுத்தப்படுவதைப் போன்று இறையருளால் கடலில் வழி ஏற்படுத்தப்பட்டது.
பார்க்க : திருக்குர்ஆன் 66:61,62,63
மழையின்போது குகையில் மாட்டிக் கொண்ட மூவர் சம்மந்தப்பட்ட
நிகழ்ச்சியில் உதவி செய்ய யாருமில்லாத, ஆள்அரவமற்ற
அந்தக் குகையிலும் அவர்கள் இறையருளைப் பெற்று குகையிலிருந்து விடுபட்டார்கள்
என்பதை ஹதீஸில் அறிகிறோம்.
பார்க்க : புகாரி : 2333
பொதுவாக ஏனைய மதங்களில் கடவுள் அருளைப் பெற அவர்கள் கூறும்
வழிமுறைகள் யாவும் பெரும் சிரமத்துடன் கடைப்பிடிக்கும் வண்ணம் அமைந்திருக்கும்.
முட்பாதைகளில் வெறுங்காலுடன் நடத்தல், தீ
மிதித்தல், முகம் கை கால்களில் வேல் குத்துதல், மொட்டையடித்தல், தலையில்
தேங்காய் உடைத்தல் என்று எண்ணற்ற, மனிதர்களை வதை
செய்யும் வழிமுறைகள் கடவுளின் அருளைப் பெறும் முறைகளாக ஏனைய சித்தாந்தங்கள்
முன்வைக்கின்றன.
ஆனால் இஸ்லாம் இவைகளை முற்றாக எதிர்ப்பதுடன் பெரும்
பாக்கியம் நிறைந்த இறையருளை சில எளிய வழிமுறைகள் மூலம் நாம் பெற்றுவிடலாம் என்று
திருக்குர்ஆனும் நபிமொழிகளும் கற்றுத் தருகின்றன. அவைகளைக் காண்போம்.
இறைநம்பிக்கை
நம்பிக்கை கொண்டு நல்லறங்கள் செய்வோரை அவர்களது இறைவன் தனது
அருளில் நுழைப்பான். இதுவே தெளிவான வெற்றி.
திருக்குர்ஆன் 45:30
இறையருளைப் பெற இறைநம்பிக்கை இன்றிமையாத ஒன்று. நாம்
என்னதான் வணக்க வழிபாடுகளைப் புரிந்தாலும் நமது இறைநம்பிக்கை சரியாக உள்ளதா என்று
பரிசோதித்துக் கொள்ள வேண்டும். வணக்கத்திற்குரியவன் அல்லாஹ்வைத் தவிர வேறு
யாருமில்லை என்ற சரியான இறைநம்பிக்கை எனும் அஸ்திவாரத்தின் மேல் எழுப்பப்படும்
நல்லமல்களே இறைவனிடம் ஏற்கப்படும்.
தாயத்து, தகடு, போன்ற
இணைவைப்பு கலாச்சாரத்தைப் புரிந்தால் நமது இறைநம்பிக்கை பாழாகி விடும். அதனால்
நாம் இறையருளிலிருந்து வெகு தொலைவில் சென்று விடுவோம். எனவே இறையருளைப் பெறுவதற்கான
அடிப்படைத் தகுதி சரியான இறைநம்பிக்கை என்பதை உணர வேண்டும்.
நம்பிக்கை கொண்டு நல்லறங்கள் செய்தோரின் பிரார்த்தனையை
அங்கீகரிக்கிறான். தனது அருளை அவர்களுக்கு அதிகப்படுத்துகிறான். (ஏக இறைவனை)
மறுப்போருக்குக் கடுமையான வேதனை உண்டு.
திருக்குர்ஆன் 4:173
இறையில்லத்தில் வழிபாடு - இறைநினைவு
அல்லாஹ்வின் ஆலயத்தில் அமர்ந்து அவனை வணங்குவது இறையருளைப்
பெற்றுத் தரும் சிறப்பான செயல் என்று திருக்குர்ஆன் கூறுகிறது.
(இறை)இல்லங்கள் உயர்த்தப்படவும், அதில்
அவனது பெயர் நினைக்கப்படவும் அல்லாஹ் அனுமதித்துள்ளான். அதில் காலையிலும், மாலையிலும்
அவனை சில ஆண்கள் துதிக்கின்றனர். வணிகமோ, வர்த்தகமோ
அவர்களை அல்லாஹ்வின் நினைவைவிட்டும், தொழுகையை
நிலைநாட்டுவதை விட்டும், ஸகாத் கொடுப்பதை விட்டும் திசை திருப்பாது. பார்வைகளும், உள்ளங்களும்
தடுமாறும் நாளை அவர்கள் அஞ்சுவார்கள். அவர்கள் செய்த நல்லறங்களுக்காக அல்லாஹ் கூலி
கொடுப்பான்; அவன் தனது அருளை அவர்களுக்கு அதிகப்படுத்துவான். தான்
நாடியோருக்கு அல்லாஹ் கணக்கின்றி வழங்குவான்.
திருக்குர்ஆன் 24:36,37,38
பள்ளிவாசல்களில் வணக்கம் புரிவதை அதிகப்படுத்தினால் இறைவன்
அவனது அருளை நமக்கு அதிகப்படுத்த தயாராக உள்ளான் என்பதை அறிகிறோம். கடமையான வணக்க
வழிபாடுகள் உள்ளிட்ட இதர வணக்கங்களைப் பள்ளியில் நிறைவேற்றும் போது எளிதாக
இறையருளை அடையலாம்.
அல்லாஹ்வின் ஆலயத்தில் அமர்ந்து சற்று நேரம் மார்க்க
போதனைகளைப் பேசினாலும் இறையருள் எனும் இனிய பாக்கியத்தைப் பெற்றிடலாம்.
அல்லாஹ்வின் தூதர் (ஸல்) அவர்கள் கூறினார்கள்: யார்
இம்மையில் ஓர் இறைநம்பிக்கையாளரின் துன்பங்களில் ஒன்றை அகற்றுகிறாரோ. அவருடைய
மறுமைத் துன்பங்களில் ஒன்றை அல்லாஹ் அகற்றுகிறான். யார் சிரமப்படுவோருக்கு உதவி
செய்கிறாரோ. அவருக்கு அல்லாஹ் இம்மையிலும், மறுமையிலும்
உதவி செய்கிறான். யார் ஒரு முஸ்லிமின் குறைகளை மறைக்கிறாரோ அவருடைய குறைகளை
அல்லாஹ் இம்மையிலும், மறுமையிலும் மறைக்கிறான். அடியான் தன் சகோதரன் ஒருவனுக்கு
உதவி செய்து கொண்டிருக்கும்வரை அந்த அடியானுக்கு அல்லாஹ் உதவி செய்து
கொண்டிருக்கிறான். யார் கல்வியைத் தேடி ஒரு பாதையில் நடக்கிறாரோ அவருக்கு அதன்
மூலம் சொர்க்கத்திற்குச் செல்லும் பாதையை அல்லாஹ் எளிதாக்குகிறான். மக்கள்
இறையில்லங்களில் ஒன்றில் ஒன்றுகூடி, அல்லாஹ்வின்
வேதத்தை ஓதிக் கொண்டும் அதை ஒருவருக்கொருவர் படித்துக் கொடுத்துக் கொண்டும்
இருந்தால், அவர்கள் மீது அமைதி இறங்குகிறது. அவர்களை இறையருள்
போர்த்திக் கொள்கிறது. அவர்களை வானவர்கள் சூழ்ந்து கொள்கின்றனர். மேலும் இறைவன், அவர்களைக்
குறித்துத் தம்மிடம் இருப்போரிடம் (பெருமையுடன்) நினைவு கூறுகிறான். அறச்
செயல்களில் பின்தங்கிவிட்ட ஒருவரைக் குலச் சிறப்பு முன்னுக்குக் கொண்டு வந்து
விடுவதில்லை.
அறிவிப்பவர் : அபூஹுரைரா
(ரலி) நூல் : முஸ்லிம் 5231
செலவிடுதல்
நல்வழியில் பொருளாதாரத்தைச் செலவிடுவதால் இறையருளை அடையலாம்
எனவும், அதன் மூலம் அல்லாஹ் தனது அருளில் நம்மை நுழையச் செய்கிறான்
என்றும் அல்லாஹ் கூறுகிறான். இறையருளைப் பெற விரும்புவோர் அதிகமான தான தர்மங்களில்
ஈடுபடவேண்டும்.
கிராமவாசிகளில் அல்லாஹ்வையும், இறுதி
நாளையும் நம்புவோரும் உள்ளனர். தாம் செலவிடுவதை அல்லாஹ்விடம் நெருங்குவதற்குரிய
காரணமாகவும், இத்தூதரின் (முஹம்மதின்) பிரார்த்தனைக்குரியதாகவும்
கருதுகின்றனர். கவனத்தில் கொள்க! அது அவர்களுக்கு (இறை) நெருக்கத்தைப் பெற்றுத்
தரும். அவர்களை அல்லாஹ் தனது அருளில் நுழையச் செய்வான். அல்லாஹ் மன்னிப்பவன்; நிகரற்ற
அன்புடையோன்.
திருக்குர்ஆன் 9:99
பூமியில் சீர்திருத்தம் செய்யப்பட்டபின் அதில் குழப்பம்
விளைவிக்காதீர்கள்! அச்சத்துடனும், நம்பிக்கையுடனும்
அவனிடம் பிரார்த்தனை செய்யுங்கள்! அல்லாஹ்வின் அருள் நன்மை செய்வோருக்கு அருகில்
உள்ளது.
(திருக்குர்ஆன் 7:56)
கட்டுப்படுதல்
இறையருளைப் பெற மற்றுமொரு முக்கியமான வழிமுறை தான்
அல்லாஹ்வுக்கும், அவன் தூதருக்கும் கட்டுப்படுதல் என்ற விஷயமாகும். இது பற்றி
அல்லாஹ் அதிககமாகவே கூறியிருக்கின்றான்.
அல்லாஹ்வுக்கும், இத்தூதருக்கும்
(முஹம்மதுக்கும்) கட்டுப்படுங்கள்! இதனால் அருள் செய்யப்படுவீர்கள்.
திருக்குர்ஆன் 3:132
இது நாம் அருளிய பாக்கியம் பொருந்திய வேதம். எனவே இதைப்
பின்பற்றுங்கள்! (நம்மை) அஞ்சுங்கள்! அருள் செய்யப்படுவீர்கள்!
திருக்குர்ஆன் 6:155)
தொழுகையை நிலைநாட்டுங்கள்! ஸகாத்தையும் கொடுங்கள்!
இத்தூதருக்கும் கட்டுப்படுங்கள்! இதனால் அருள் செய்யப்படுவீர்கள்.
திருக்குர்ஆன்
24:56
முஸ்லிம்கள் அனைவரும் இந்த வழிமுறையைக் கடைபிடிக்கத்தானே
செய்கிறார்கள் என்று எண்ணுவது முற்றிலும் தவறாகும்.
அல்லாஹ்வுக்கும் அவனது தூதருக்கும் கட்டுப்படுவது என்றால்
பின்பற்றப்படுவதற்கும் கட்டுப்பட்டுவதற்கும் உரியவர்கள் அல்லாஹ்வும் அவனது தூதர்
ஆகிய இருவர் மட்டுமே. அவர்களையன்றி வேறு யாரும் பின்பற்றப்படுவதற்கு தகுதியானவர்
அல்லர் என்ற தெளிவான கொள்கையோடு கட்டுப்படுவதாகும்.
முஸ்லிம்களில் பலர் இத்தகைய தெளிவில் இல்லை. இமாம்கள், ஸஹாபாக்கள், முன்னோர்கள்
என பின்பற்றப்படுவதற்குரிய பட்டியல்களை நீட்டிக் கொண்டே இருக்கின்றனர். ஆகவே
யாரையும் பின்பற்றலாம் என்பது அல்லாஹ்வின் அருளை பெற்றுத்தராது. அல்லாஹ்வையும், அவனது
தூதரையும் மட்டுமே பின்பற்றுவதே இறையருளைப் பெற்றுத் தரும் என்பதை புரிந்து கொள்ள
வேண்டும்.
குர்ஆனைச்
செவியேற்றல்
அருள்மறையாம் திருமறைக்குர்ஆனை ஓதுவது மட்டுமின்றி அதைச்
செவியேற்பதும் இறையருளை இனிதே பெற்றுத்தரும் நற்செயலேயாகும்.
குர்ஆன் ஓதப்படும்போது அதைச் செவிமடுங்கள்! வாய் மூடுங்கள்!
நீங்கள் அருள் செய்யப்படுவீர்கள்!
திருக்குர்ஆன் 7:204
அல்லாஹ்வின் தூதர் அவர்கள் இறையருளைப் பெறும் நோக்கில்
திருக்குர்ஆனைப் பிறர் ஓத தாம் செவியுற்றிருக்கிறார்கள்.
அப்துல்லாஹ் பின் மஸ்ஊத் (ரலி) அவர்கள் கூறியதாவது: (ஒரு
முறை) நபி (ஸல்) அவர்கள் என்னிடம், "எனக்கு
(குர்ஆனை) ஓதிக் காட்டுங்கள்!'' என்று
சொன்னார்கள். நான், "தங்கள் மீதே குர்ஆன் அருளப்பட்டுக்
கொண்டிருக்க, தங்களுக்கே நான் ஓதிக் காட்டுவதா?'' என்று
கேட்டேன். அதற்கு அவர்கள், "ஆம்'' என்று
சொன்னார்கள். ஆகவே, நான் "அந்நிஸா' எனும்
(4ஆவது) அத்தியாயத்தை ஓதினேன். "ஒவ்வொரு
சமுதாயத்திலிருந்தும் (அவர்களுடைய நபியாகிய) சாட்சியை நாம் (மறுமையில்) கொண்டு
வரும்போதும், (நபியே!) உங்களை இவர்களுக்கு சாட்சியாக நாம்
கொண்டு வரும்போதும் (இவர்களது நிலை) எப்படியிருக்கும்?'' எனும்
(4:41ஆவது) வசனத்தை நான் அடைந்தபோது நபி (ஸல்) அவர்கள்,
"இத்துடன் போதும்!'' என்று
சொன்னார்கள். அப்போது நான் அவர்களைப் பார்த்தேன்; அவர்களின்
கண்கள் இரண்டும் கண்ணீரைச் சொரிந்து கொண்டிருந்தன.
அறிவிப்பவர் : இப்னுமஸ்ஊத் (ரலி), நூல்
: புகாரி 5050
சினிமாப் பாடல்கள் போன்ற தீயவற்றைச் செவியேற்பதைத்
தவிர்த்து திருக்குர்ஆனைச் செவியேற்றால் அல்லாஹ்வின் அருளும் நம் வசமாகும்.
நன்மைகளும் அதிகமாகும். குர்ஆனுடனான நமது தொடர்பும் அதிகரிக்கும்.
பாவமன்னிப்பு
"என் சமுதாயமே! நன்மைக்கு முன்னால் தீமையை ஏன்
அவசரமாகத் தேடுகிறீர்கள்? நீங்கள் அருள் செய்யப்பட அல்லாஹ்விடம் பாவ மன்னிப்புத் தேட
மாட்டீர்களா?'' என்று அவர் கூறினார்.
திருக்குர்ஆன்
27:46
அல்லாஹ்விடம் பாவமன்னிப்பு கோரினால் அதன் மூலம் அருள்
செய்யப்படுவோம் என இக்குர்ஆன் வசனம் கூறுகின்றது.
பாவமன்னிப்பு கோருவதை இறைவன் பெரிதும் விரும்புவதால்
இறையருள் பெற இது சிறந்த வழியாக இறைவன் ஆக்கியுள்ளான்.
ஆகவேதான் எத்தகைய பாவத்தைப் புரிந்திருந்தாலும் இறைவன்
மன்னிப்பான் என்ற நம்பிக்கை உணர்வோடு பாவமன்னிப்பு கோர வேண்டும். இறையருளில்
நிராசை அடைந்து விடக்கூடாது.
தமக்கு எதிராக வரம்பு மீறிய எனது அடியார்களே! அல்லாஹ்வின்
அருளில் நம்பிக்கையிழந்து விடாதீர்கள்! பாவங்கள் அனைத்தையும் அல்லாஹ் மன்னிப்பான்.
அவன் மன்னிப்பவன்; நிகரற்ற அன்புடையோன் என்று (அல்லாஹ் கூறுவதைத்)
தெரிவிப்பீராக! உங்களுக்கு வேதனை வந்து உங்களுக்கு யாராலும் உதவிய செய்ய முடியாத
நிலை வருவதற்கு முன் உங்கள் இறைவனுக்குக் கட்டுப்பட்டு அவனிடமே திரும்புங்கள்!
திருக்குர்ஆன் 39:53,54
நபிகள் நாயகம் ஒரு நாளில் 100 முறை
பாவமன்னிப்பு கோரியுள்ளனர்.
அஹ்மத்
9431
இது என்றும் நம் நினைவில் கொள்ளத்தக்கது.
இறையச்சம்
ஒரு முஸ்லிமிடம் இருக்க வேண்டியவற்றில் எல்லாவற்றையும் விட
மிக முதன்மையானது இறையச்சமே. அல்லாஹ்வைப் பயந்து நடந்தால் அவனது அருள் கூடி வரும்
என்பது அல்லாஹ்வின் ஏற்பாடு.
நம்பிக்கை கொண்டோர் (அனைவரும்) சகோதரர்கள் தாம். எனவே
உங்கள் சகோதரர்களுக்கிடையே இணக்கத்தை ஏற்படுத்துங்கள்! அல்லாஹ்வை அஞ்சுங்கள்.
அருள் செய்யப்படுவீர்கள்.
திருக்குர்ஆன்
49:10
"எங்களுக்கு இவ்வுலகிலும், மறுமையிலும்
நன்மையைப் பதிவு செய்வாயாக! நாங்கள் உன்னிடம் திரும்பி விட்டோம்'' (எனவும்
பிரார்த்தித்தார்) "என் வேதனையை நான் நாடியோருக்கு அளிப்பேன். எனது அருள், எல்லாப்
பொருட்களையும் சூழ்ந்திருக்கிறது. (என்னை) அஞ்சி, ஸகாத்தும்
கொடுத்து, நமது வசனங்களை நம்புகின்ற மக்களுக்காக அதைப் பதிவு செய்வேன்'' என்று
(இறைவன்) கூறினான்.
திருக்குர்ஆன் 7:156
நம்பிக்கை கொண்டோரே! அல்லாஹ்வை அஞ்சுங்கள்! அவனது தூதரை
நம்புங்கள். அவன் தனது அருளில் இரு மடங்கை உங்களுக்கு வழங்குவான். உங்களுக்கு
ஒளியை ஏற்படுத்துவான். அதன் மூலம் (நல்வழியில்) நடப்பீர்கள். உங்களை மன்னிப்பான்.
அல்லாஹ் மன்னிப்பவன்; நிகரற்ற அன்புடையோன்.
திருக்குர்ஆன் 57:28
இரக்க
உணர்வு
அல்லாஹ்வின் தூதர் (ஸல்) அவர்கள் கூறினார்கள்: விபச்சாரியான
ஒரு பெண், ஒரு கிணற்றின் விளிம்பில் தனது நாக்கைத் தொங்கவிட்டுக்
கொண்டிருந்த ஒரு நாயைக் கடந்து சென்றாள். அந்த நாயைத் தாகம் சாகடிக்கவிருந்தது.
அதைக் கண்ட அப்பெண் உடனே தன் காலுறையைக் கழற்றி அதைத் தன்
முந்தானையில் கட்டி (கிணற்று) நீரை இறைத்து அதற்குக் கொடுத்தாள். ஆகவே, அது
பிழைத்துக் கொண்டது. அவள் ஓர் உயிருக்குக் காட்டிய இந்தக் கருணையின் காரணத்தால்
அவளுக்கு (பாவ) மன்னிப்பு வழங்கப்பட்டது.
அறிவிப்பவர் அபூஹுரைரா (ரலி), புகாரி
3321
ஒரு விபச்சாரி அற்பமான நாயிடம் இரக்க குணத்துடன் நடந்து
கொண்டதாலே இறையருள் பெறுகிறாள் எனில் அதுபோன்ற பெரும் தீமைகளிலிருந்து
விலகியவர்கள் மனிதர்களிடம் இரக்க குணத்துடன் நடந்து கொள்வது எந்த அளவு இறையருளைப்
பெற்றுத்தரும் என்பதை விளங்கலாம்.
நபி
மீது ஸலவாத் சொல்வது
நபிகள் நாயகம் மீது அவர்கள் கற்றுத்தந்த படி ஸலவாத் சொல்வது
இறையருளைப் பெற்றுத்தரும்.
நபி( (ஸல்) அவர்கள் கூறினார்கள்: தொழுகை அறிவிப்பாளரின்
அறிவிப்பை நீங்கள் செவியுற்றால் அவர் கூறுவதைப் போன்றே நீங்களும் கூறுங்கள்.
பின்பு என் மீது "ஸலவாத்' சொல்லுங்கள்.
ஏனெனில், என் மீது யார் ஒரு முறை "ஸலவாத்' சொல்கிறாரோ
அதன் காரணத்தால் அவருக்குப் பத்து முறை அல்லாஹ் அருள் புரிகின்றான். பின்பு
எனக்காக அல்லாஹ்விடம் "வஸீலா'வைக்
கேளுங்கள். "வஸீலா' என்பது சொர்க்கத்திலுள்ள (உயர்) பதவியாகும்; அல்லாஹ்வின்
அடியார்களில் ஒருவருக்குத் தான் அது கிடைக்கும். அந்த ஒருவர் நானாகவே இருக்க
விரும்புகிறேன். எனவே, எனக்காக அந்தப் பதவியை (அல்லாஹ்விடம்)
கேட்பவருக்கு (மறுமை நாளில்) எனது பரிந்துரை அவசியம்
கிடைக்கும்.
அறிவிப்பவர் : அம்ர் பின் அல்ஆஸ் (ரலி) முஸ்லிம் (628)
ஸலவாத்துன் நாரிய்யா எனும் பெயரில் நபி கற்றுத் தராததை
ஓதினால் இறையருளுக்குப் பதிலாக இறை சாபத்தைப் பெற வேண்டி வரும் என்று எச்சரித்துக்
கொள்கிறோம்.
பொறுமை
நன்மை, தீமை
அனைத்தும் இறைவனின் புறத்திலிருந்து ஏற்படுகிறது என்பது இஸ்லாத்தின் அடிப்படையான
விதி எனும் நம்பிக்கை. தமது வாழ்வில் என்ன துன்பம் ஏற்பட்டாலும் பொறுத்துக்
கொள்பவர்களுக்கு இறையருள் கிடைப்பது நிச்சயம்.
ஓரளவு அச்சத்தாலும், பசியாலும்
செல்வங்கள், உயிர்கள், மற்றும்
பலன்களைச் சேதப்படுத்தியும் உங்களைச் சோதிப்போம். பொறுத்துக் கொண்டோருக்கு
நற்செய்தி கூறுவீராக! தமக்கு ஏதேனும் துன்பம் ஏற்படும் போது "நாங்கள்
அல்லாஹ்வுக்கே உரியவர்கள்; நாங்கள் அவனிடமே திரும்பிச் செல்பவர்கள்'' என்று
அவர்கள் கூறுவார்கள். அவர்களுக்கே தமது இறைவனின் அருள்களும், அன்பும்
உள்ளன. அவர்களே நேர் வழி பெற்றோர்.
திருக்குர்ஆன் 7:156,157
நன்மையை
ஏவி தீமையைத் தடுப்பது
சமுதாய மக்களிடையே சத்தியப் பிரச்சாரம் செய்பவர்களுக்கு
இறையருள் கிடைப்பது உறுதி என்று இறைமறை வசனம் எடுத்துரைக்கின்றது.
நம்பிக்கை கொண்ட ஆண்களும், பெண்களும்
ஒருவர் மற்றவருக்கு உற்ற நண்பர்கள். அவர்கள் நன்மையை ஏவுவார்கள். தீமையைத்
தடுப்பார்கள். தொழுகையை நிலைநாட்டுவார்கள். ஸகாத்தையும் கொடுப்பார்கள்.
அல்லாஹ்வுக்கும், அவனது தூதருக்கும் கட்டுப்படுவார்கள். அவர்களுக்கே அல்லாஹ்
அருள்புரிவான். அல்லாஹ் மிகைத்தவன்; ஞானமிக்கவன்.
திருக்குர்ஆன் 9:71
Source ; www.onlinepj.com